news

Kraftur er orð vikunnar.

25. 03. 2019

Sæl veriði kæru foreldrar og vinir.

Í dag hefst önnur vika í áræðnilotu. Lotulykill vikunnar er kraftur. Að hafa kraft er okkur öllum mikilvægt þá bæði líkamlega sem og andlega til að takast á við það sem lífið hefur uppá að bjóða. Hægt er að gera ýmsar æfingar til að þess að börnin/einstaklingar nái í frumkraftinn sinn sem oft er búið að bæla og umbúðarvefja þannig að viðkomandi þora oft ekki að nota kraftinn sinn nema með duldum leiðum. Til dæmis er hægt að nota húsgögnin á kjarnanum í kraftæfingar, t.d. að klifra upp á borð og stóla og stökkva niður á dýnur. Einnig má leyfa hlaup og hopp þar sem pláss er gott og gjarnan dýnur á gólfum, hlaupa öskrandi af fullum krafti, láta sig detta og veltast um, kitla og hlæja og hrópa og ærslast, allt í gegnum leikinn. En svo má ekki heldur gleyma því að það krefst líka krafta og kjarks að standa uppá mottu og segja frá sjálfum sér, fara með stuttan leikþátt, syngja fyrir vini og fleira og fleira.

Í Mætti málsins (markvissu málörvuninni) okkar er hljóð vikunnnar hljóðið "í". Við höldum áfram að efla orðaforðann í Dýrunum og í Tákn með tali eru tákn vikunnar táknin " Horfa" og " Þögn (hafa hljóð)". Að venju höldum við ótrauð áfram að vinna með þætti eins og hljóðkerfisvitund, setningamyndun, fornöfn, spurnarorð og margt margt fleira. Allt er það gert í gegnum leik og gleði.

Eigið dásamlega viku kæru vinir og vinkonur.

© 2016 - Karellen